港股噚日高開267點，諗住可以收復番上星期五嘅失地，點知A股唔生性，連2300呢個鐵底都守唔住，恒指最後都要倒跌收場，後市有機會下試早前嘅裂口底部18200。
胡總早排喺中國加入WTO十周年紀念日發表講話，指會繼續催谷內需，預期社會消費品零售總額年均增長超過15%，2015年有望達到32萬億人仔，產銷電視嘅創維（751）肯定可以受惠。
集團剛公佈11月銷售數字，總共賣咗85.4萬部電視，按年上升10%，雖然比起10月嘅按年升幅55%，出現明顯放緩，但如果按月比較，依然有11%增長，證明動力仍在。加上毛利較高嘅3D電視機，佔平板電視銷售量，亦由31%擴闊至35%，趨勢持續嘅話，對盈利肯定有幫助。
創維噚日收報3.03元，跌1.3%，戰友可候2.90元水平吸納，目標睇升一成，屆時PB都未夠1.2倍。
唐牛