上周五，懸掛八號風球，坐上的士，司機轉身說：「照價加五蚊。」我點點頭，心想風大雨大的，加五塊錢，合理。司機續說：「呢五蚊，當係畀我嘅保險費。八號風球，死咗保險都冇得賠，邊個叫你開工？」司機頭髮花白，年約五十多歲，大概覺得坐地起價不好意思，滔滔不絕在解釋。
「你哋就唔同，死咗有得賠，乘客全天候有得保。」這個司機咒完自己，還咒起我來。「𠵱家香港地，冇份工真係好慘㗎，好似我個仔咁，讀書唔成，搵極搵唔到工，成日群埋啲唔知咩人，唉！」

坐的士最怕碰到那些呻到樹葉都落的司機，將你的片刻寧靜亦剝奪乾淨。我一如往常般保持沉默，希望他識趣收口。
「好彩我個女生性，𠵱家讀緊大學，都讀得唔錯，佢都叫做捱過吓世界，中五畢業做過幾個月嘢，佢個鬼婆上司同佢講：『你做嘢幾叻都好，但冇學歷，我最多畀把鎖匙你開門㗎咋，不如你去讀大學啦，到你畢業，如果我間公司重喺度，我請番你。』就係咁，我個女𠵱家喺加拿大讀緊書。」
「一年要成廿幾萬㗎！好多人一年都搵唔到廿幾萬啦，既然個女讀得書，咁我兩公婆辛苦啲，死慳死捱都要畀佢讀啦。」
下車時，收費表顯示$50.2，我給了他六十元，開門下車，他叫住我：「先生，話咗收多五蚊就五蚊。」他一臉堅決，把五塊錢遞給我。
我沒堅持，接過，說一聲：「謝謝。」下了車。
這位司機，謝謝你在風雨淒淒下，送我們一股暖流。