長江基建（1038）主席、人稱「小超」嘅李澤鉅（Victor），噚日喺香港搞咗個「聯合國大會」，逾千位嚟自唔同國家嘅人雲集香港，仲請咗一班肥肥白白嘅白天鵝，究竟係搞邊科呢？

1,200人來港逼爆酒店

原來係長建一年一度嘅「環球一家同樂日」，近年長建嘅業務遍佈亞洲、歐洲、澳洲、美洲，員工有成2.4萬人，前幾日請咗當中1,200位嚟自20間成員公司嘅員工嚟香港，真係逼爆北角海逸酒店。
小超原本好忙，聽聞本身schedule咗個非常早嘅時間，約見澳洲總理特恩布爾會面，唔知係咪同早前收購澳洲能源企業DUET有關？但佢都要特登去同班員工見面，喺開幕禮上面佢仲話，唔同國籍嘅同事聚首一堂，好似聯合國大會一樣。
當日活動其中一個環節，係各間成員公司派出代表參加舞蹈比賽，最終係由英國燃氣供應商Northern Gas Networks贏咗，佢哋演《天鵝湖》，女性表演就冇乜特別箒，但原來仲有班滿臉鬍鬚嘅男人，着住白雪雪嘅紗裙同絲襪跳舞，賣力到呢個地步都真係抵贏，唔知小超睇完有乜感覺呢？

李華華
mailto:[email protected]