現年41歲嘅韓國女歌手朴正炫今日透過所屬事務所宣佈，將於下月15號喺夏威夷與圈外人男友結婚，升呢做人妻。

朴正炫所屬事務所表示：「雖然朴正炫及未婚夫目前正居住喺韓國，但為咗遷就雙方居住喺美國加州及加拿大嘅家人，兩人將於夏威夷舉行婚禮。婚後朴正炫將繼續喺韓國居住，繼續歌手嘅生活，以更好嘅音樂及公演活動回報大眾。」據悉朴正炫及未婚夫於2014年經友人介紹認識，未婚夫係加拿大韓僑，於首爾某大學任職英語教授，朴正炫於前年1月公開戀情，並不時喺節目高調放閃。