爭持激烈嘅立法會新界東補選終於塵埃落定，公民黨楊岳橋以一萬票力壓民建聯周浩鼎，力保該黨原有新東議席不失，亦守住泛民喺立法會地區直選嘅關鍵一席。有政界中人話若然多萬幾人投本土派，呢個位就拜拜，多謝部份激進泛民支持者大局為重撐岳少，但明言岳少個人魅力亦不可小覷，唔少陪同佢落區拉票嘅人都話，岳少女人緣非凡，老中青俱殺，堪稱新一代政界女殺手。

好似今日清晨喺調景嶺新聞中心咁吖，公眾席中撐岳少嘅市民，以女性為多，在場嘅公民黨黨魁梁家傑望到都忍唔住講咗句，岳少嘅支持者，全部都係女性喎，唔會係葡萄啩？其實無線《學是學非》兩位女主持，噚日已經喺社交媒體做手勢暗撐岳少；而唔少有陪岳少拉票嘅人，都話見證岳少有唔少女粉絲，皆因噚日競選期間，好多女支持者主動要求同岳少合照，仲要係不同年齡階層都有，相對之下，男粉絲主動要求合照嘅呢，就少咗一大截。

而今日清晨約兩點十五分先到新聞中心嘅岳少，冇再著競選風褸、換上西裝再次官仔骨骨，兼且連鬚都剃到乾乾淨淨，青靚白淨番，據悉佢喺附近租咗酒店，投完票返咗酒店休息一陣就去新聞中心。

查實識岳少嘅人都知，佢份人較貪靚；商台節目主持人陳志雲今朝都問到貪靚嘅岳少成日著西裝，若有衝擊行動會唔會方便？岳少笑稱冇諗過呢個問題，但強調：「我嘅西裝都唔係好貴，都係cheap嘢嚟，唔妨礙我嘅工作嘅」。