韓國男團Super Junior(SJ)嘅隊長利特近日飛到瑞士拍攝綜藝節目《快遞來了》，點知就勁唔好彩遇上小偷，佢噚日喺Instagram上載咗車窗被打爛嘅相，留言寫道工作人員嘅手機護照全部唔見晒，難以馬上返韓國繼續拍攝。

由於事出突然，令粉絲都相當擔心偶像嘅安危，而利特所屬嘅SM事務所回應指：「利特飛到當地進行22日嘅拍攝，幾乎已經拍攝完，一行人只係唔見嘢、冇受傷，可謂不幸中之大幸。利特等人已經取得臨時證件準備返韓，預計聽日返抵韓國。」節目組方面亦指：「於瑞士嘅拍攝已經完畢，係去機場途中發生嘅事。」而利特亦知道粉絲嘅擔心，噚晚特地再更新IG，再次提醒粉絲旅遊時要小心保管財物。