林保怡、陳慧珊同郭秀雲今日喺中環出席「執起來！海岸清潔迎夏日」啟動禮，儀式後，身為清潔海岸大使嘅保怡搭船入南丫島索罟灣一個沙灘做清道夫。現時喺香港大學修讀教育博士學位嘅陳慧珊，未能跟保怡同行，不過佢有帶老公同囡囡到場支持。

保怡表示平時有跑步習慣，發現山上面有好多垃圾，於是佢影相發微博呼籲大家唔好再亂拋垃圾；陳慧珊就因爲喺美國長大，所以從小已學識垃圾分類，兒時又試過跟爸爸做環保活動。

問到佢哋相隔幾多年冇合作？保怡話：「間中都有做，因為我有啲訪問都會搵佢；其實上次《鑑證實錄》食飯，我叫佢留個期俾我，因為上年2月開始，我同《瑪嘉烈與大衛》兩個導演一齊諗咗4、5個劇本，我想搵佢演，不過佢冇期，我都覺得學業為重。」陳慧珊十分好學，早年於香港大學修讀完英文碩士後，目前正修讀博士學位課程，陳慧珊話﹕「其實呢3、4年我都冇期，不過唔使上堂會好啲。」

精選娛聞，喺晒《娛果》
http://fb.com/appledailyent