立法會原定今年9月搬到添馬艦新大樓，主席曾鈺成噚日話計劃可能有變，承建商本來話5月交樓，家陣要延至7月中，電腦系統可能唔夠時間做測試，由於議員投票用個電腦系統好重要，為免急就章搞出大頭佛，立法會寧願押後一年先搬屋。
政界盛傳煲呔想在立法會新大樓宣讀任內最後一份施政報告，落任前創造歷史，如果立法會押後搬屋，煲呔夢想隨時成空，因此曾鈺成話當佢哋催促承建商後，工程進度明顯加快，至於能否如期搬屋，佢話冇得逼，總之waitandsee啦。

高官健康受關注，曾鈺成自爆血管塞咗近四成，唔使通波仔，不過要食薄血藥，由於跑步不能減低膽固醇，因此佢連跑步機都丟咗，太太又嫌佢跳舞唔得，唔同佢跳舞，因此冇乜運動，見步行步，食藥算數。有眼疾嘅曾鈺成話近日睇咗齣3D電影，唔係《肉蒲團》，因為太太唔畀睇，惟有睇《關雲長》。