彭拿治俾阿仙奴借去列斯，前日對車路士省入一粒，就幫列斯搶分成功，諗住可以幫埋阿仙奴，重返榜首，上演一幕「無間道」，點知「兵工廠」臨尾失波，自己唔爭氣！
彭拿治入波幫列斯搶番一分，都算唔錯，起碼暫時壓過狼隊，唔使包尾。其實，列斯自從炒列特，由格雷頂上之後，季初一批借將好似卓佩斯、奧林比、Z卡馬拉開始唔受重用，沙高同洛基祖利亞亦受傷摺咗，借將只剩彭拿治有機會任正選，都算為自己爭番啖氣。不過，彭拿治借用期即將屆滿，我求大俠覺得「兵工廠」應該繼續外借佢，既唔使出糧，又用「無間道」方式向其他強隊搶分，咁咪重好！

米堡破紀錄六場清白唔敗家
米杜士堡聯賽同樸茨茅夫交白卷，連續六場不失球，刷新球會近二十八年來最長時間不失球紀錄，對呢隊季初頻失球嘅東北虎打下強心針。另一好消息係中堅伊奧古聖誕復出，陣容更完整，有冇機會挑戰今屆常易位嘅第四位，就要球員生性。不過，對噚日捧米堡W嘅波友肯定有損失囉。

馬龍自食其果鬆踭停賽冇得倒戈
被周身肌肉嘅「郵差」踭頭打中，有乜嘢後果？小馬後衞尼殊最近俾馬龍嘅鐵踭打中嘴巴，結果「爆嘴」要縫咗兩、三針。而馬龍亦俾聯盟罰停賽一場，點知呢場咁啱就係湖人周日主場對馬龍嘅舊隊爵士，對郵差嚟講特別意義深重，但𠵱家佢就有得睇冇得打，都可謂自食其果！