劉青雲、古天樂、譚耀文、莊思敏同張建聲一班《神行太保2016》嘅演員，今晚喺尖沙嘴出席電影煞科宴，電影改編自陳慎之嘅故事，陳慎之角色就由青雲演繹。

啱啱宣佈會為今屆電影金像獎做司儀嘅青雲，就話其實係爾冬陞提議佢做，佢話：「咁多年嚟去金像獎幫手嘅都係義工，今年係第三十五屆，咁搵得我都覺得應該做番啲嘢。」記者笑佢攞咗兩屆影帝，應該要幫手，點知青雲抵死咁話：「仲喺下面坐咗十幾年0添。」

問青雲做司儀有咩準備功夫？佢竟然話：「冇㗎，我都唔知司儀要做啲咩，既然佢哋咁大膽搵我，我都好大膽咁出嚟做，可能到時我係三十五屆以嚟，最少講嘢嘅司儀。」

至於古仔就話好想睇青雲嘅表現，仲話其實青雲份人好幽默，反而自己就剩係有執生能力，但唔係好多嘢講。