下個星期日係行政長官選舉，距本欄見報日仲有足足一個星期，任何事情都可以發生。選舉對於股市嘅影響，今年可能係史無前例咁大，因為舊年兩隻被稱為「黑天鵝」嘅事件，就係英國脫歐同特朗普當選，兩件事並唔係黑天鵝，因為結果二揀一已經寫咗喺選票上面，但係世人傾向以黑天鵝去形容事件。

如果要挾硬喺兩件事中間，擠少少黑天鵝出嚟：呢兩件事嘅發生，其實係好事，股市歌舞昇平，而非事前講到天跌落嚟咁壞。

先講英國脫歐公投，6月23日，英國人投票，一個選擇係留歐2.0，另一個選擇脫離歐盟，事前政客已經警告脫歐會令經濟有幾大影響，股市又會跌幾多，諸如此類。結果開出嚟，除咗即日英國股市有少少波動之外，當日英國富時100指數至今升17%，今年3月16日仲創歷史高位7442點，相比冇公投脫歐嘅法國，同期股市升13%，喺「我討厭政治，只係講經濟」嘅國際趨勢之下，脫歐完勝留歐。

至於另一個更嚴重嘅就係特朗普對奧巴馬2.0希拉莉，選前政客同華爾街例牌大合唱，講到唔選奧巴馬2.0，就會世界末日，奧巴馬2.0當選就會繼續牛市之類，結果亦都一如脫歐，11月8日美國總統投票日出現小爆冷，美國股市隨後接連創歷史新高，道指期內升14%。

吊詭嘅係華爾街嘅市場人士事後解釋係特朗普減稅同基建政策，刺激股市上升，奧巴馬2.0牛市之聲已經消失。金融財俊把口話要2.0，到英國脫歐、特朗當選，將資金倒入股市倒得最快又係同一班金融財俊。

高明相信，同樣嘅股市走勢應用喺香港效果會更強，因為外資錢過去冇大舉湧港，係擔心香港會因北京一個政策，突然變成中國其中一個城市，喺呢方面，中國嘅民間資本會更加明白。香港特首再選出2.0，即係股市現況不變，繼續睇住美英大牛市，香港上落市無限輪迴。

香港如果爆小冷門，選出一個堅持一國兩制嘅人，突顯香港兩制差異，令到中國北水知道將錢放喺香港，同將錢放喺中國有唔同，股市或者有一線生機。近期千億成交重臨，市場覺得大時代會重臨，但係大牛市一定有觸發點，英美已經教曉世人，點樣撻著股票市場，唔講政治，只講股票，想食大茶飯，選委應該知道點做。

高明
www.facebook.com/bigricetea/