英皇國際（163）橫行咗四個月，日線圖三條平均線滙合，呢類走勢，唔理向上定向下，一爆驚人，有得諗喎。馬交及彩票概念股當中，阿媽都有上市嘅孖寶系列有寶威（024）、冠軍（092）及嘉華國際（173）。近期所見，呢三位阿媽，股價表現都好過旗下的華彩（8161）、看通（1059）及銀河（027），但獨漏「英皇Twins」中的163。
再講，英皇國際物業包括英皇集團中心、銅鑼灣羅素街及百德新街部份地王舖，另外揸住淺水灣海灘道總樓面77萬平方呎土儲，正係興建緊淺水灣麗都廣場，物業全部筍嘢，英皇國際資產底厚硬淨，最新NAV近3.4元，現價1.91元，折讓超過40%，炒折讓一樣得。又馬交股呢期似翻兜，龍頭新濠（200）又再貼近1年高位，同類股包括英娛（296）開始異動，阿媽英皇唔係直接受惠，但同氣連枝因素強烈。博英皇破去年頭高位2.175元，跌穿1.85元走人，有值博率。

麗國同系最落後

麗國（191）上星期唞氣，完全無鑊氣，但要昅住，又講兩點：第一，麗新系中，麗國最新NAV1.72元，現價0.495元折讓71%，同系麗展（488）34%，麗豐（1125）經呢期狂飆，折讓得番54%，麗國折讓最大。
要咁睇，呢期市場焦點全都炒大價嘢，但資金換馬，會開二三線呢瓣，麗國炒折讓及同系落後因素強烈。第二，麗國去年供股，供股價0.5元，因為認購不足，包銷商上身，呢期麗國咁啱喺0.5元水平打底，當時接貨者差唔多打和，但蝕咗唔少機會成本，麗國係咪如此這般算數？麗國若破0.53元阻力位，應該有一輪衝刺。
錢雋