【好大粒花生】KD黑警論撐麥伊 奧尼爾:咪做「架樑」
NBA勇士杜蘭特奧尼爾麥伊Shaqtin'a Fool
有睇開「巨無霸」奧尼爾(Shaquille O'Neal)每周精選NBA最戇居片段嘅搞笑節目《Shaqtin'a Fool》,都知勇士中鋒麥伊(JaVale McGee)成個御用男主角咁瘋狂出場,結果麥伊周四終於忍唔住要爆啦,喺打完主場贏快艇嘅常規賽後同奧尼爾喺twitter引爆罵戰,花生友睇得鬼咁開心。杜蘭特(Kevin Durant)喺周五操練後發表完「黑警論」撐隊友,奧尼爾隨即就喺twitter反擊,呢場口水戰睇嚟有排打!
話說麥伊周四喺twitter爆發,話自己已經好勤力,仲要俾奧尼爾玩足五、六年,唔係以為佢會唔出聲?點知奧尼爾繼續鬧佢係蠢材,仲話會打到佢瀨屎,結果兩邊齊齊爆粗。據報勇士已經私下接觸《TNT》電視台,了解奧尼爾點解啄住麥伊唔放,而教練卡爾(Steve Kerr)同KD亦喺周五操練後聲援,卡爾話完全明白點解麥伊咁火滾,KD更直言:「麥伊非常努力,佢嚟到勇士為我哋作出好多貢獻,亦只係想好似所有人咁被尊重。我明白奧尼爾都係搵食啫,公司想佢做呢啲以球員為樂嘅事,但當你一次又一次唔合理地咁恥笑,仲喺嗰位球員唔想你咁做時威嚇佢,我唔知警察原來可以咁樣威嚇平民囉……真係好幼稚。」
KD呢番「黑警論」,矛頭直指身兼佛羅里達後備警察嘅奧尼爾!不過,奧尼爾睇嚟冇諗住收手,喺twitter連發推文叫KD咪做「架樑」:「我明白你幫隊友出頭係好型,但你位隊友麥伊依然係廢柴(bum),佢辣起火頭先,我會搞掂佢。」