【韓流】話題勝喬妹朴信惠新劇 《天空城堡》寫實描述韓國怪獸家長
天空城堡
近期有唔少韓劇受到觀眾熱捧,如女神宋慧喬夥拍男星朴寶劍主演嘅tvN新劇《男朋友》、朴信惠孖型男玄彬合作嘅tvN新劇《阿爾罕布拉宮的回憶》等,不過JTBC收費台嘅新劇《天空城堡》(Sky Castle),就靠劇情、口碑而一度撼贏《男朋友》、《阿爾罕》登上話題榜冠軍,成為網民熱話。
《天空城堡》由廉晶雅、李泰蘭、尹世雅、吳娜拉、金瑞亨等韓國女星主演,於上月23號首播,由於演出陣容唔算好強勁,所以首播一集僅得1.727%收視率,不過隨住劇情發展及觀眾嘅好評,令《天空城堡》嘅收視持續上升,大前日(22號)播出嘅第10集更創新高達11.298%收視率。
《天空城堡》係講述韓國上流社會嘅「Sky Castle」別墅住宅區中,一群欲扶助丈夫事業、培育子女成為二代貴族嘅貴婦故事。故事一開始交代其中一個家庭嘅兒子成功考入名牌大學,令其他貴婦羡慕不已,紛紛求該名貴婦透露兒子成功嘅「秘訣」,點知該名貴婦就突然自殺,引發觀眾嘅好奇。劇情圍繞自殺事件而展開,實際上正反映韓國社會怪獸家長嘅存在,家長將自己嘅慾望強加到子女身上,令子女感到龐大嘅壓力,寫實嘅情節令觀眾更加投入。
劇中仲有一個重要角色,就係金瑞亨飾演嘅入學協調員,協調員類似升學班嘅指導老師,主要是想辦法令受託人嘅子女能入讀名牌大學。據悉入學協調員係真實存在喺韓國社會上,比普通補習老師仲勁,雖然收費高昂,但能大大提升子女進入名牌大學嘅成功率,所以劇中有廉晶雅向金瑞亨下跪,求對方幫自己愛女成功入讀名牌大學嘅一幕。
精選韓流,喺晒《娛果》
http://fb.com/appledailyent
廉晶雅向金瑞亨下跪,求對方幫自己愛女成功入讀名牌大學
劇集由(左起)金瑞亨、吳娜拉、尹世雅、李泰蘭、廉晶雅主演