水貨大亨袁仁祥呢排四圍問人紐約住宿行情，問當地有冇好似日本咁平嘅民宿住？似乎蠢蠢欲動想去紐約，唔知係咪想喺嗰邊開全球第一間祥哥水貨專門店？佢話：「其實想過去睇吓Bape美國分店，話晒係喺美國開嘅第一間專門店，而Bape又想喺美國擴張，點都要昅吓！呢間嘢名叫BapeStore，細細間裝修花喱花碌幾型㗎！上個禮拜開張大吉，坐館Nigo自己都飛埋過去進行點睛儀式。不過開張第一日有好多搞笑嘢，例如貨倉啲貨唔知擺咗去邊？收銀機又未安得切，搞到唔夠散紙找畀人，現場有少少亂龍！

「至於啲貨呢，其實同日本分別唔大，不過好多日本賣唔晒，或賣晒搵唔番嘅款都可以喺NewYork呢邊搵到。定價就美國貴過日本囉，對於美國人嚟講，可能未能一時之間接受㗎！
「生意方面聽講唔錯。其實Ape都算好嘢，咁多年嚟售價冇平過，就算巿場上有好多翻版，但坐館Nigo從來唔會走出嚟話翻版對佢哋打擊好大，因為佢哋明白翻版同正版其實係兩個不同巿場。反觀香港嗰班創作人，啲作品一唔賣得就出嚟賴翻版商，或網上下載影響佢哋嘅銷量，佢哋從來唔會自己檢討吓自己作品質素。唉，香港創作人其實好短視㗎！」

主持人：大食Jack
八卦熱報：[email protected]