格老自從舊年2月離開美國聯儲局，以80歲高齡出外搵真銀，生活越來越精采。每接受一次演講邀請，盛惠最少10萬美元（折合78萬港銀），過去年半搵到嘅，仲多過以前聯儲局份人工，加埋佢本新書將於下個月出版，屆時肯定豬籠入水。

唔止咁噃，佢仲開埋顧問公司，打算接收少於一打嘅客戶，而且每個行業只接受一間公司禮聘，話就話避免利益衝突，其實係吊高嚟賣至真。
不過有麝自然香，5月初接到第一單大生意，成為德盛安聯旗下最大債券公司太平洋投資管理（PIMCO）嘅顧問後，噚日又有大客話，要留住格老，點都唔想佢走。
係邊個？就係德意志銀行嘞。格老已經獲德意志銀行邀請留任企業及投資銀行部門嘅顧問，不過就唔會插手資產管理部門，費事同PIMCO嘅顧問角色有衝突喎。咁識做，抵佢發嘅！