雖然區議會選舉11月22日先舉行，10月2日提名，但各路有心人已經磨拳擦掌，傘後組織「青年新政」更一馬當先，日前已舉行誓師大會，預告派9人出戰。雖則咁早誓師有宣傳之效，但選舉法例規定，一旦宣佈參選就要計選舉經費，花生友相信佢哋嘅選舉經費之後都要慳住使，否則爆煲就麻煩嘞。
傘後團體定位好清楚，本土議題一定係主打，話明自己香港自己救，梗係唔可以將問題假手於人。花生友都問過傳統泛民陣營，會唔會主打本土議題湊熱鬧？大部份都話各有各做，而最重要嘅係，始終區選係靠地區服務攞分，相信若然繼續密密做，唔會走失好多飛嘅。

佢哋今年反而聯合成同一陣線，喺地區工作之外，搞多一項議題吸新票源，就係逐一揭破地區嘅大白象工程。花生友問過嘞，泛民主派早前成立咗個區選小組，研究區選策略同部署，都會負責埋呢個問題，例如反對興建大埔「林村天安門」，雖則一如所料阻止唔到喺區議會通過，但至少引起社會大眾關注，部份泛民覺得成效唔錯，嚟緊荃灣西樓角花園重建都係主打。
有泛民中人同花生友講，香港人最緊張公帑係咪用得其所，如果多揭幾個呢類大白象工程，其實係有助市民留意，血汗錢畀建制派壟斷嘅區議會倒落鹹水海，相信有助選民區選投票時，作出明智嘅抉擇。

花生友
周二、四刊出