當年今日
關於我們

李亞鵬嫣然基金資助埋割包皮手術?

蘋果日報 2014/01/16 06:00

李亞鵬包皮嫣然基金嫣然天使兒童醫院

早前李亞鵬就被爆出唔少財政問題,包括善款蒸發及資助嘅手術費離奇偏高,例如話其他慈善基金資助每個患唇齶裂嘅小朋友手術費,人均只需五千蚊人民幣,但李亞鵬嘅嫣然天使基金就每人盛惠9萬9,果真差天共地。

內地知名爆料人周筱贇三度實名舉報稱,由其名下慈善項目「書院中國」到「嫣然天使基金」一路緊纏不放。最新一單,係有人搵到聲稱係嫣然基金同嫣然天使兒童醫院去年嘅救助名單,當中赫然有「包皮過長」「包莖」等等項目。

其實之前已有報道,指嫣然天使兒童醫院嘅醫生,大多數都係嚟自一間整容醫院,更有指該醫院最著名就係做隆胸手術,今次更發展到「包皮過長」呢類型手術。但嫣然基金工作人員祁小姐表示,以上項目係針對雅安地震受災母嬰,係專款專用,仲話由雅安地震發生到現在,都一直都有繼續做緊。

其實外間一直要求嫣然天使基金詳細公開財務條目,但嫣然只肯公開年度收支表,連資產負債表、業務活動表、現金流量表、財務報表附注都冇。周筱贇發炮指:「沒有完整披露,就無法核實關聯交易、利益輸送,李亞鵬把這麼多錢花去哪了?」祁小姐就回應話,嫣然基金唔係獨立法人,只係紅十字會基金嘅二級基金,嫣然嘅審計報告一直都係公開,任何人都可以喺紅會嘅網站上查到。

至於《南都娛樂週刊》主編謝曉就喺微博寫道:「面對如此多質疑,為何遲遲不能公開財務報表?除了一種原因。」究竟係乜嘢原因?自行猜想。