嗱嗱終於做嘢,之前神劇《太陽的後裔》熱播全城,喺香港仲掀起一股煲《太陽》熱,唔少人都出盡法寶諗計煲劇,當中Viu就快人一步,購買咗《太陽》版權,仲做到劇集喺韓國播出街後4小時內有免費繁體中文字幕版追看,當時港劇迷都一到凌晨就等住繁體中文字幕版睇,但係捱住眼瞓追劇都幾慘情,第二日又要趕住返工,咁會冇乜精神。
Viu知道港劇迷都唔想捱眼瞓追劇,但同時又想同韓國睇齊同步追劇,為咗唔被劇透,Viu今次就認真做嘢,事關韓國KBS電視台繼《太陽》之後再推出第二齣先拍後播嘅劇集《任意依戀》,《任意依戀》由秀智同金宇彬主演,噚日秀智先同金宇彬現身新劇發佈會,劇集聽晚韓國時間10點就會首播,早前劇集已成功賣埠到多個唔同地方,當中台灣緯來電視台亦會同步播出,而成功獲得香港獨家播映權嘅Viu,今次亦都好照顧本地劇迷,為咗唔令港劇迷捱眼瞓,聽晚10時上Viu就會有繁體中文字幕版嘅《任意依戀》免費睇,令劇迷得以做到同步追劇。