「伍家朗一記大力扣殺，千鈞一發間對手勉強救球，關鍵時刻家朗趁機於網前擊球，對手筋疲力盡，無力回天！」這個勝利夢，近月伍家朗已夢過不知多少遍，過去大半年體壇停擺，以往年中不斷周遊各國出賽的伍家朗終日於體院閉門練習，疫情反覆，奧運延期，未知的前景雖然磨人，但睡夢醒了，男單世界第八的他抖擻精神，繼續挑戰現實的奧運夢。

記者、攝影：洪量丰

遙望今年三月香港羽毛球隊戰罷全英賽即急急趕回港避疫，是這麼遠，又那麼近，轉眼又是年底，伍家朗依然記得當時的愴倉卒，「全英賽前去咗歐洲一個月，打之前都興奮，等咁耐終於落場，之後情況有啲變，歐洲開始爆發，但入場觀眾都冇戴口罩，我開始知驚，打之前都有啲提心吊膽，自己發揮又唔太理想，輸咗大家睇得出想盡快返香港。」三月風起雲湧，國際體壇大賽幾日間接連停擺，月尾甚至奧運也宣佈延期一年，運動員日夜苦追的目標也煙消雲散，世界大變，但伍家朗自言年輕，他樂觀指延期反而給予他進步機會，坦然面對變遷，「當時隔離又封館，都唔知點先有正常訓練，如果又封又要打奧運，心理上未準備好，而家突然多咗一年，一年後我年紀都唔算大，相信身體狀況唔會話走下坡，反而再多一年時間去進步。」

就如重物墜地，先是轟隆大震，然後便是漫長的死寂，伍家朗回港後要居家隔離兩周，體壇訓練時停時啟，疫情來襲體院又閉門禁足，家朗坦言一時間苦悶難耐，「我平時每一日除咗練波都有其他活動，我又鍾意出街周圍去，隔離時淨係留喺屋企，幾辛苦，好似每日起身都冇乜好做。」他說平日出外比賽心情緊張，最愛到處以吃紓壓，談起每年亞錦賽時隨大師兄胡贇於其家鄉湖北吃全羊宴的日子他雙眼放光，疫情下足不出戶，悶極惟有發掘餘閒煮食興趣，「以前都想試，但冇乜時間，疫情期間就有機會，我周末會自己煮，當係發展一門手藝，通常上網睇教學，有時打畀阿嫲攞意見，再加自己嘗試，有咩拿手我唔敢講，不過煮最多就魚香茄子。」

說到底，運動員最看重和掛念的，還是那長方比賽場，過去半年只練不賽，生活冗悶，家朗不諱言難免感到枯燥，日有所思，他指甚至發夢也夢見比賽場面，「而家淨係練波都幾唔習慣，冇比賽嘅時間，個人好似冇咗目標；出去比賽會有唔同對手，訓練來來去去都係幾個隊友，大家對練球路非常之熟，冇晒新鮮感。」迷茫的又豈只他一人，奧運延期體壇「大執位」，一代經典林丹七月宣佈退役，伍家朗生涯四次擊敗林丹，名將黯然離開，家朗坦言可惜，「如果唔係疫情，我估佢點都會堅持到2020年奧運後，不過對年紀大運動員冇咗比賽，目標冇咁明確，會比較難捱過呢段日子，所以都可理解。」問他如何形容2020年，他道是平淡，但21年將至，東京奧運臨近，他笑說終於要進入「作戰狀態」。外國體壇常言「Trust the process」（相信過程），即使今年如何難過，終究是為明年鋪路，年中疫情最嚴峻時期，體院一度只得四名羽毛球運動員留守，伍家朗正是其中一人，在那他日夜苦練的場館內，牆上高掛一張印有「輕裝上陣，創造奇蹟」的橫額，其實能夠輕裝，不過是勤奮不懈的堅毅成果。

出生日期：1994年6月24日（26歲）

身高：1米80

體重：70公斤

握拍：右手

現時世界排名：8

最高世界排名：6（2017年8月）

榮譽：20年泰國羽毛球大師賽冠軍、19年泰國羽毛球公開賽亞軍、17年馬來西亞羽毛球大師賽冠軍、16年香港羽毛球超級賽冠軍

-----------------------------

《體蘋果》陪你睇波講波

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！