當年今日
關於我們

隔牆有耳:出錢出力 蔡加讚紅色仕途高升 - 李八方

蘋果日報 2018/01/24 00:00


全國政協常委會噚日朝早繼續喺北京開會,討論新一屆全國政協委員名單,常委陳永棋形容名單大換血,會有好多新面孔,仲透露最年輕委員僅32歲,係青年才俊,相信會為香港帶嚟新元素。咁啱嘅係建制圈流傳捲入「謎網50」風波嘅玩具大王蔡志明,佢囝囝蔡加讚有機會喺呢屆獲任港區全國政協委員。蔡加讚生於1986年,今年啱啱32歲,有人向八方確認蔡加讚就係棋哥口中嘅青年才俊。
蔡加讚近年喺親中政圈極度活躍,除咗係義工聯盟常務副主席,更擔任廣西社團總會會長,似乎向北發展鋪咗條靚路,而蔡家嘅出手闊綽亦令唔少人記憶猶新,好似2014年民建聯黨慶,多次競投嘅蔡加讚至少捐咗400萬,身體力行愛國愛黨,紅色仕途高升,有乜咁奇?