聖誕假期將至，唔少人個心已經唔喺office，既然仲未放到假，就開下Party等「讓靈魂遊走」，滿足一下！好似運輸及房屋局局長陳帆咁吖，今日啟程到北京準備列席人大常委會會議，就高鐵一地兩檢議題答問前，都不忘與同事開P，釋放下有繁重工作量嘅同事靈魂！

其實唔少政策局，每年都會自行搞聖誕Party，運房局都唔例外，今日喺金鐘力寶軒開餐，局內同事聚首一堂慶祝一番。臨上機前嘅陳帆都有出席兼講返兩嘴，例牌菜係多謝同事過去一年努力工作。咁又好正常，因為嚟緊一年繼續打仗，自然要令同事嘅靈魂與肉身，都要繼續為佢同個局拼搏。

席間唔少得嘅當然係抽獎，同時亦有玩下遊戲，喺冬至前夕，團團圓圓。