當年今日
關於我們

寄宿有利 - 左丁山

蘋果日報 2015/04/25 00:00


左丁山對香港大學舍堂教育及精神認識膚淺,不知何故,多年來在中環遇上的港大朋友,多是利瑪竇堂宿生,昔年同事余志明(Gabriel Yu)現在是城市大學校董,捐助款項贊助發揚崑曲不遺餘力,白先勇先生在香港推廣崑曲,於城大及中大開花,與余志明的捐獻不無關係。
余志明係利瑪竇堂舊生,有一年,大概已經係20年前或更早,利瑪竇堂籌款修葺宿舍,在富麗華酒店舉行籌款晚會,余志明邀請左丁山參加,見到多好多中環名人,有張威臣(籌款委員會主席)、李柱銘、張永霖、林中麟、黃霑等等等,大家唱Hall Song時,那股激情,令外人嚇親,左丁山就從未見過林中麟可以有咁激動嘅表情嘞,唱歌之外,捐款更熱情,可以一晚籌到七百萬大元,當時余志明話俾左丁山聽:「你地中大講邊間書院,我地港大講邊一間舍堂!」
四月十七日港大中大校友議會聯會搞論壇,一位張博士講St. John's歷史與教育,令左丁山覺得,讀港大入唔到舍堂,咪蝕底好多?
聖約翰堂源出聖公會,利瑪竇堂由耶穌會主辦,在港大係「死對頭」;雙方著名畢業生輩出,互爭雄長,張博士話今日聖約翰堂學生入學之後,要簽字承諾參加堂內主辦嘅tutorial,修讀柏拉圖、阿里士多德經典著作,猶如上補習課,讀書都讀多啲。
港大走讀生則無此幸福咯,另外太古堂與信興書院(新舍堂)嘅講者都話佢地平時籌辦好多校外交流活動,學術與社交兼備,促進學生各方面之才能,無怪政制及內地事務局局長譚志源對記者講,冇太古堂嘅生活教育就冇佢之做官事業。
香港八大院校,除嶺南大學因學生較少,可以全部寄宿之外,其他大學嘅宿位嚴重不足,除影響本地生外,亦不利招收國際學生及交換學生,但講來講去,香港地皮貴重,政府不輕易撥地(兼且有居民反對)興建大學宿舍,所以此問題好難好難解決。
中大當然亦唔夠宿位,好在有九間書院各自負責通識教育及學生活動,每間書院都有不同形式之類似港大聖約翰堂之教育環節,走讀生與寄宿生並無分別,在港大冇宿位嘅學生就較為蝕底。