聖誕節除咗聖誕老人會出沒，帶畀市民無限歡樂嘅小丑，近年都經常喺聖誕節現身商場等大家笑住過節。僱員再培訓局因應市場需求，三年前都開辦小丑藝術表演人員基礎證書課程，至今有逾350人報讀！

23歲嘅黃錫鴻中學畢業後報讀上述小丑課程，實行將興趣變為職業，佢接受政府新聞網訪問時透露，自細都鍾意玩雜耍，會上網自學鑽研技術同花式。

有關課程提供172小時培訓，包括化妝、魔術、雜耍等，黃錫鴻話課程有助訓練佢演出時嘅基本功，亦學識帶動觀眾情緒，「我會觀察台下觀眾反應，反應特別好的觀眾，才會願意接受邀請上台，才能有良好互動。」

佢修讀課程後決心成為專業雜耍師，目前以自僱形式參與社區中心、商場等表演，亦喺學校教興趣班，今年再報讀僱員再培訓局新推出嘅小丑藝術表演進階技巧（氣球及魔術）證書課程，希望持續升呢，帶更多歡樂畀觀眾。