陳志雲入咗商台做CEO之後進行清洗行動，搵老友蘇施黃喺下個月主持新節目《大玩派》，接替林曉峰（阿Lo）同車婉婉嘅《巴巴閉AfternoonD》。雖然阿Lo俾商台炒魷，但早年俾阿Lo鬧爆嘅無綫，最近竟然搵阿Lo重返娘家，真係塞翁失馬，焉知非福。
噚日阿Lo同馮仁昭承認重返無綫，佢話：「好開心，其實呢個幾月蘊釀緊，不過自己冇講出嚟。」講到阿Lo喺07年離開無綫之後曾經多次鬧爆TVB，例如寸當年無綫總經理陳志雲搶藝員飯碗，又鬧過無綫裁員，對此阿Lo話：「證明呢個世界係圓嘅，以前講過嘅嘢冇得收番，自己嗰陣係仔，好多嘢講到收唔到口，以後我會乖㗎啦，要安份守己，因為我要養家，屋企有三件，兩個仔同我太太（康子妮）！」

拍崔建邦做主持

阿Lo今次同無綫再簽藝員約，主要係做綜藝節目，下個月佢會先同崔建邦做《翡翠歌星紅白鬥》司儀，之後再同許亦妮、金剛同蕭正楠等主持新節目《玩轉三周半》，馮仁昭聽落都覺得發展唔錯。阿Lo噚日最後一日同車婉婉主持商台節目，婉婉仲將自己同阿Lo嘅合照放上微博，話好唔捨得。