當年今日
關於我們

【李八方online】習大大「一帶一路」偉大構想竟冇建制派關注 鍾國斌嬲豬

蘋果日報 2019/03/20 15:44

鍾國斌李八方ONLINE陳百里一帶一路

立法會每逢周三大會,議員都會透過質詢要求政府回應關注事項,自由黨黨魁鍾國斌今日喺立法會提出有關習大大嘅「一帶一路」口頭質詢,點知立法會會議廳近乎空無一人,建制派「關鍵缺席」,商經局副局長陳百里答完後全場鴉雀無聲、全無議員跟進,激到鍾國斌好嬲豬。
鍾國斌條問題係問政府,2016年成立咗嘅一帶一路辦公室做成點、將來搞啲乜等。雖然政府唔係派局長邱騰華答,但陳百里都冇求求其其。點知陳百里答完後,鍾國斌一起身就鬧,唔知佢條問題係太無聊定無用,議會竟然冇人再有跟進提問,「你睇吓,議會係冇人喺度,主席,你(有冇)見過立法會一個質詢時間係議員都冇,或者冇跟進問題?」
面對呢個咁空洞嘅議會,鍾國斌似乎都無力再同政府糾纏,只能慨嘆一句:「一帶一路係國家咁重要嘅政策,竟然喺香港議會冇人跟進或者質詢問題,我冇嘢跟進。」主席梁君彥都唔知點樣回應鍾國斌,左顧右盼,陳百里一臉茫然咁起身問:「個跟進問題係?」鍾國斌冇咁好氣,惟有講多次:「無嘢跟進!」
建制派尤其係鍾國斌嘅黨友真係太不該喇,鍾國斌一片苦心跟進「一帶一路」呢個習近平口中嘅「國家總體佈局」,愛國愛黨嘅建制派竟然唔擁護吓,點對得住香港?點對得住國家?點對得住習大大呢?

-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef