狄易達、EO2成員Eddie同Otto今朝喺沙田科學園參加「三項鐵人賽2014」，黃翠如就擔任賽事嘅頒獎嘉賓。問翠如BB閒時有冇同男友Edwin(蕭正楠)一齊做運動呢？佢一聽到「Edwin」三個字就表現尷尬，仲用手印條頸啲汗話「真係好熱」。

至於BB個答案係「未試過」，不過佢話：「之前拍劇，佢運動好好。」唔做運動，平時一齊會做咩？翠如BB話：「嘩，諗下先，其實佢拍緊劇，唔多相處機會。」佢仲透露細個嗰陣有哮喘，所以中學階段冇再上體育堂。

參加咗鐵人賽已經有4年嘅達仔，佢話自己游水唔叻，所以今年同其他成員組隊，而Eddie同Otto就參與個人賽事。講到成績方面，佢哋話同上年差唔多，Eddie話：「Otto游得快，好似飛魚。」Otto就話：「我哋玩咗12年，02年入行畀經理人大，於是玩到依家，不過做運動好嘅。」

Eddie提到有份參演電影《殺破狼2》，當中有2/3戲份會於泰國取景，由於當地局勢緊張，所以會移師番香港拍。講到吳京拍跳樓戲受傷，Eddie話：「下面鋪晒木箱，我同佢一齊跳嗰陣，大家差錯腳拗柴。雖然已經1個月，但依家踎低都係爭啲。」緋聞女友朱慧敏知唔知你受傷？Eddie話：「我冇話畀屋企人同朋友知，淨係經理人知。」