潘明輝明晚（21日）接手的數駒，質量都唔錯，單是高伯新兩匹新勝馬「紅旗飛將」及「問鼎高峰」已是其中；運到有時唔到你唔信，後駒排外檔，內側可能頂到佢的「魔連奴」及「精算率然」均退出，疑慮一掃而空。

其中出戰第二場五班1650米的「紅旗飛將」接連兩仗在同程入前兩名，上次大勝原因，並非突然「升呢」，明顯因賺超慢步速所致，明晚用潘明輝抵消評分、負磅加幅，仍感受到再搏誠意。

唯一不明是同場的「滿貫中環」用巫顯東，排九檔，會否上前鬥搶？由於估計步速可能未必太慢，決定搏徐雨石馬房的「常旺財」，大前仗同程排12檔，蝕超慢步速都後追第三，用表現說明已到位。

此駒近兩場扳上2200大長途賽事，演出有點反覆。今次隔個幾月後出賽，賽前做了六課拍跳，復爭一哩，換上李寶利，排二檔起步，只要一如預料不必留太後，有權殺晒！