八方問過一向都係攝影發燒友嘅陸頌雄,佢解釋國產鏡頭發展都仲係比較落後,選擇唔多,但Olympus性價比就好OK,系統細緻又唔貴,但強調自己最後都冇買,只係window shopping啫,佢又話買國貨撐國家企業自主創新,唔代表抗拒買其他嘢,家陣全球化自由市場,「唔相信有一個人可以淨係買自己國產貨,可以生活到」,最緊要係支持自由、公平、互惠嘅貿易。
日本貨唔怕睇,咁美國貨又怕唔怕買?陸頌雄就話:「唔會話刻意避免,但會優先採用國產,有啲產品國產唔係太成熟,冇理由夾硬買唔啱用嘅嘢,我哋理智㗎嘛。」咁又係,之前有傳媒都報道過,原來佢架車係美國貨。之不過咁,作為精明政治人……吖,唔係,係精明嘅消費者至啱,當然都有用國貨,佢用緊嘅手機就係華為嘞,自爆「前日仲買咗華為平板電腦畀媽咪做生日禮物」,大讚華為出品,實屬佳品,「高質高質」。噢,𠵱家要做到政治正確,果然既要出錢又要出力,辛苦晒。
李八方