【本報訊】卡拉OK、夜總會和麻雀天九耍樂處昨晚6時起需停止營運14天,仍有不少雀會在規例生效後如常營業。位於觀塘駿業街的金港雀會越夜越精采,晚上6時半起雀友陸續「埋位」,目測至少有八枱客人。
記者以顧客身份親身查詢,職員指仍可安排留房,並保證雀會持食肆牌照,不受條例影響。雀會內亦可進食,職員向記者提供一張茶餐廳外賣單張,但強調餐廳與雀會沒任何關係。但記者其後致電金港雀會查詢時,職員卻回覆「我哋唔太清楚,我哋已經無開喇」,急忙掛線。
位於觀塘恆安街的觀塘雀會,同樣如常營業。晚上6時半,記者以顧客身份致電問仍否可以打牌,職員回覆「嚟嚟嚟,你照過嚟」。對於港府新安排,職員稱「我無收到消息,如果唔係點會照叫你過嚟」。記者其後表明身份查詢,職員指雀會持會所牌照,可如常營業「仍然有牌打」,「我哋戴口罩、量體溫嗰啲,更加嚴謹啲囉」。但記者告知即使食肆及會所均不可提供雀局,她則稱「都擔心(違規)」,須視乎雀會負責人安排。