得，仲好似添！

一代美人狄美摩亞個前夫演員艾斯頓古查（AshtonKutcher），係，係狄美摩亞個前夫，因為除咗呢樣，仲可以令大家記得佢嘅嘢，就係佢拍咗好多睇完都唔知想講咩嘅愛情片，好似同已故女星布妲妮梅菲(BrittanyMurphy)拍嘅《JustMarried》、同妮坦莉寶雯（NataliePortman）合作嘅《戀搞好朋友》(NoStringsAttached)、仲有《殺手靚太唔易做》做靚女嘉芙蓮希歌（KatherineHeigl）嘅殺手老公...咁多年，艾斯頓真係令人另眼相看嘅電影，就係得《連鎖蝶變》(TheButterflyEffect)。

不過，睇嚟今次係艾斯頓翻身嘅時候喇， 嚟緊8月16號上映嘅自傳式電影《Jobs》，講艾斯頓扮演嘅喬布斯(SteveJobs)點樣發跡，成立蘋果公司(AppleInc.)，到之後點樣被逼離開，到最後回歸兼創造出一系列震撼全球嘅電子產品... 故事唔講太多喇，大家不妨等電影上畫自己去睇， 不過齋睇trailer，艾斯頓嘅教主造型真係似到十足，仲有佢嘅招牌眼鏡look添呀！

嗱，又咁睇，似係冇用嘅，都要有演技先得，而且今次係演人人都識嘅蘋果教主，套戲出街後會有咩評鑑，天堂同地獄一線之差，不過睇到艾斯頓真係想博一鋪。


逢周五隨《蘋果日報》附送嘅時尚美容雜誌《add》第八期經已出版，封面是趙薇，大家可以上《add》嘅官網 http://add.appledaily.com睇足本網上版。除咗有趙薇專訪，仲有好多時裝靚嘢睇！