中秋臨近，美心嘅流心奶黃月餅今年掀起炒風，擅長經營蛇齋餅糭嘅建制派，豈能落後於形勢？建制派政團以優惠價向市民兜售奶黃月，但呢個世界點會有免費午餐呢？建制派透過會員制度，攞咗市民嘅資料，先有優惠畀你啦。辦事處設喺民建聯油尖旺區議員楊子熙議員辦事處嘅油麻地居民權益關注會，早前就以200元「會員優惠」做招徠，賣奶黃月餅，但其實唔係平正價好多，冇嚟誠意。究竟奶黃月餅緊要，定係你嘅私隱、個人資料緊要，大家可自行判斷。

除咗奶黃月，仲有雪糕禮券優惠添！只要閣下肯出賣個人資料畀保皇黨，就可以用10蚊買價值50蚊嘅雪糕禮券。新會員或者現有會員介紹親朋戚友入會，都可以享有呢個優惠，似足層壓式推銷。但大家要預咗享用完優惠，日後選舉一到，就會收到訊息叫你投票畀建制派。大小選舉臨近，地區市民一定兩餐無憂，視乎大家肯唔肯出賣個人資料畀建制派動員。