各大地產商為進一步推廣旗下商場業務,近排都好興北上尋找商機,好似新地就搞咗個自由行購物參觀團,招待五十位廣東省旅客,嚟香港免費玩三日兩夜。
新地舊年十月份曾經北上廣東省、上海同埋北京,搞咗一連串展覽同嘉年華會,推廣旗下商場,同期搞咗個抽獎,得獎者可以免費來港旅遊,結果收到幾萬張抽獎表格,有一百位幸運兒。
早前先安排首批五十名得獎者來港,交通費同食宿全免,重安排埋一連串節目及觀光景點,少不免參觀旗下商場,指定商戶會提供特別折扣優惠,各人可謂盡興而歸。
海峰園栢蕙苑廢出成績
富城集團屬下嘅北角海峰園同鰂魚涌栢蕙苑,最近攞到環保署頒發「明智減廢」標誌,確認兩屋苑喺減少製造廢料方面作出嘅貢獻。
由環保署主辦,生產力促進局任顧問嘅「明智減廢計劃」,目的係鼓勵企業減少同管理其產生嘅廢物,採取有效減廢措施。
而海峰園同栢蕙苑管業處,除舉辦不同類型嘅環保活動同減廢活動外,喺物業通訊上都有刊登環保資訊。
上海記者採訪港樓市
早年內地房地產急速發展,香港記者經常組團到上海、北京等地採訪,𠵱家就風水輪流轉,輪到香港地產市道開始有起色,好似噚日喺傲雲峰嘅售樓處,就有一位嚟自上海國際金融報嘅記者,採訪賣樓嘅熱鬧情況,寫番篇報道。
長實趙國雄成日往返內地工作,認識唔少內地記者,噚日重親自招呼,老趙成日鬼鬼馬馬,已經周不時喺本地報章亮相,睇嚟佢今次連國內嘅見報率都多埋。