華爾街戰線|新股ETF年年跑贏大市 追美股IPO贏多輸少
杜昇
今年美股精彩程度不論大定小、舊定新都係贏,其中以IPO形式上市新股,就算高開一大截,往後的股價表現一樣不失禮。先講個玩法同香港不同的是,美股不設散戶抽新股環節,水位看似唔多,但翻查彭博數據再剔除基金或無完整數據,今年大大少少總共305隻新股掛牌,如果隻隻都有買,以第一口價就衝兼當你買得到計,至今平均回報都幾唔錯,有26%。
當然操作上就不太可能,特別交易時間隻隻都唔同,隨時等到香港時間兩點。筆者做一次事後孔明式回顧,試下搵個方法去分一杯羹,自己揀定隻ETF,都有幾種唔同的玩法。
首先劃條界,太細的話不作考慮(太細的表現幾乎一面倒差),筆者按周三收市價計去排除5,000萬美元市值樓下的新股,總共302隻,由公開交易第一價計至周三收市價計,當中有224隻升,78隻跌。最差Phoenix Tree Hldgs(DNK)跌76.5%,最好的Greenwich LifeSciences(GLSI)升747%。
收窄到只係揀大隻而熱門的頭十隻,其實都可以好唔錯,照計當你衝得入場都都基本上無視估值,現價只係Airbnb、Dash及RPRX現價仍然跌穿第一口價。
另一個玩法就係ETF,由早前在家辦公ETF(WFH)定疫苗ETF(GERM)都快就出,新股ETF當然都有,分別為IPO及FPX,不過當中的構成會不同的規則及繼而影響到表現。
FPX︰按市值揀頭100隻美國IPO/按季調整/持有4年
IPO︰最快於IPO後第6日買入或按季調整/持有2年
不過兩隻ETF資產總值唔算多,歷史較長的FPX有19.4億美元,IPO更加僅有6.96億美元 。當中可能因為產品比較複雜,加上宣傳問題。其實單計表現絕對唔失禮,而且使費又唔算貴(約0.006%)。
揸幾年之後博到隻IPO入指數(唔一定係標普500),對股價會有支持,從結果論,呢招當然到今日仍是可行的,幾乎從任何時間點去計都跑贏大市。
其實背後就冇乜秘密,肯去嚴守紀律(因為寫晒規則無得唔跟),整體美股IPO贏多輸少情況下,其實年年都跑贏大市。因為當中有唔少以倍計的升幅可以對沖潛水新股,例如係Tesla、Facebook、Paypal等都以倍數計升幅。
其中一個賭注就在於美股會否推陳出新,特別係近年巔顛覆性創新股,按目前電動車取代汽油車,Square/Paypal取代銀行的趨勢,講未來的股票正處於上風。而買ETF其中好處就係幫你守紀律,拉長時間而且分散投資,最終可以坐得定先贏得到。
不過要留意的是IPO供應逐漸減少,過去4年5000萬以上的IPO較2011至14年減少18%,整體金額亦少30%。其中一個原因就是特殊目的收購公司SPAC,漸漸搶到唔少份額,日後再講SPAC。
-----------------------------
-----------------------------
-----------------------------
-----------------------------