韓國tvN綜藝節目《名單公開2017》前晚播出最新一集，當中就以明星特別恐懼症為主題，大爆藝人嘅弱點。

當中冠軍就係金喜善，身為人妻兼人母嘅金喜善原來有「魚類恐懼症」，佢曾透露因為細個同父母去魚生店，睇住大家食活生生嘅魚大受打擊，所以從小就好怕魚。

亞軍係曾出演綜藝節目《一日三餐》嘅車勝元，車勝元有「鳥類恐懼症」，佢本身討厭所有鳥類，不過已經死咗嘅雞佢都敢烹調，但活雞佢就唔敢掂。而季軍就你李鍾碩，佢身為明星竟然怕被人關注，仲有關注恐懼症，如果大家太關注佢，佢就會臉紅心跳，仲曾自爆細個因為怕被關注，所以連喺街都專揀小路行。

第四名係Epik High嘅隊長Tablo，佢有開車恐懼症，就連發夢開車佢都覺得係一件可怕嘅事；第五名係少女時代成員Sunny，佢有爆竹恐懼症，原因係佢細個曾經喺科威特居住，長期聽到打仗聲，所以特別驚爆竹聲、爆破聲等；第六名係Highlight嘅尹斗俊，佢有遊樂設施恐懼症，一定唔會去玩機動遊戲，亦曾喺上高中時反對學校搞郊遊。

第七名係god嘅尹啟相，佢有尖端恐懼症，對一切銳利嘅物體都表示抗拒，之後佢曾參與節目嘅體驗前世活動，當中仲發現自己前世係因為喺戰爭中被箭射傷左眼而死，所以先會咁驚尖嘅物體。最後第八名就係韓劇《死而復生的男人》嘅女星姜藝媛，佢因為擁有豐滿上圍而有社交障礙症，由細到大都好怕將身材暴露於人前，因而令佢自卑，亦開始有社交障礙。