公關大姐大做冬，每年一度，冬至之日，中午請晒公司夥計食飯，知道左丁山冇飯食，叫埋去。大姐大以前一定去「鏞記」做冬，理由好簡單，佢公司一開始就在鏞記食飯，之後一路順風順水，故此一路都唔變。今年搞搞新意思，因為做公關呢行，最弊墨守成規，適當時候轉換吓，先至有創意，於是班大隊去寧波同鄉會，呢個會所好耐冇去過咯，大姐大話呢間會所革新後，地方舒服咗，食物水平甚佳，夠晒valueformoney（物有所值），不妨試吓。

上到去，全場滿座，張張大枱坐滿人，一望而知多數係公司做冬。成間公司或者成個部門同事齊來吃飯，慣常現象就係全場人客之中，陰多陽少，OL人數遠遠超出男性僱員。為何如此，唔使多講，總之女白領愈來愈多，男藍領愈來愈多，送水樽、抹玻璃窗嘅全部係男工，坐在冷氣辦公室對住電腦嘅就多數係女士，生仔唔生女嘅父母，請注意你個公子，叫佢唔好掛住打機，讀吓書、睇吓書，得唔得！
寧波同鄉會在四樓，一樓係香港大學校友會，聽講自從陸羽阿二（二鑊）入主廚房後，加埋班陸羽舊夥計，場面搞到好熱鬧，時時爆棚。過往冇乜人到嘅日子，外人上去食飯，冇計啦，一樣招呼。最近聽兩位港大校友講，因生意甚好，港大佬都冇位，唔掂，於是有校友提議以後只准會員（港大校友）入內。此議未知是否已經實行，我哋呢啲外人就唔係幾好意思走入去咯，以免俾人問：「你邊年畢業？」不過律師黃、賓架L等等，全部係港大校友，佢哋話只要左丁山出聲，就代我訂位喎。