70歲梁小龍捲入婚外情風波，噚日疑忽然在微博撰文向外遇表白，引起網民齊齊剝花生，有網民話2年前見過梁小龍帶老婆到養生館，兩公婆好恩愛，其徒弟亦力撐師傅無辜，指梁小龍嘅微博於1個多月前被盜用；不過，亦有網民提出質疑：「視訊電話的截圖怎麼解釋」，召喚梁小龍直接出面解釋疑團。

今日《蘋果》終於聯絡到男主角，梁小龍在電話中否認偷食：「你做賊會唔會公開話畀大家知？出微博嘅手機係蘋果，我手機係華為，我都好少上微博，之前已經有好多次呢啲事情，我只不過冇理到，亦唔想畀某啲傳媒故意炒作，所以盡量少上微博，我連微博密碼都唔記得，想删除微博都唔可以。」

無辜捲入偷食疑雲，梁小龍越講越激氣：「本來唔想講，只不過真係多次又話我叫雞，同老婆喺街度行，又暗示叫雞。一次我買餸又話我送外賣，一次喺堂兄弟嗰頭飲咖啡，又話我賭馬，根本都唔識賭馬。一次又一次咁，覺得好奇怪，為咗銷量好啲嚟傷害人有乜意思。好過份，已經有人整（蠱），仲要傳媒加鹽加醋，自己一直唔出聲，好低調，低調到不得了。根本自己生活好正常，唔賭錢，間中幫啲朋友打麻雀，一個月一次，每日休息就去練功，完全冇地方去，好容易見到我。唉，所以話真係唔想出聲，好過份，你可以訪問所有人，仲有可以訪問我啲仔女，問下我點對佢哋，訪問我老婆點對佢。」

梁小龍自認是一個好老公：「我對家庭係全香港最好一個，可以話畀你聽，我賺到嘅錢，百分九十九畀晒我老婆，我啲仔女要乜畀乜佢，成日教佢哋點做人。你可以訪問識我嘅人，我嘅為人係點。本來真係唔想講，有千幾個徒弟喺大陸，個個拜師畀錢我，全部捐晒中國慈善總會，你試問下中國慈善總會係咪。」

最後，梁小龍叮囑記者：「你做得呢行都明，請唔好借題發揮，斷章取義去傷害人，人在做，天在看，我問心無愧呀！」

精選娛聞，喺晒《娛果》
http://fb.com/appledailyent