日本偶像女歌手濱崎步將會喺下星期三推出全新細碟《fairyland》，由於對上一張細碟《STEPyou》銷量普通，所以步姐今次落足心機宣傳，佢除咗下星期會狂上音樂節目增加曝光率之外，早前又揼本到夏威夷拍攝《fairyland》MV，硬銷夏日氣息。而同碟另一首歌曲《alterna》嘅MV風格就同《fairyland》相反，步姐喺MV入面重會化身做機械人，內容重非常有意思㖭。

扯線木偶

步姐可能有見日本傳媒近年成日話佢人氣大不如前，所以今次特別喺《alterna》嘅MV入面自嘲一番，向傳媒提出無聲抗議。步姐喺MV入面化身做機械人，係一個人氣唱歌機器，佢十足扯線公仔咁受人擺布，重經常受到一班黑衣打扮嘅記者追訪，搞到冇晒自由。
可惜花無百日紅，人氣不繼之後，機械人唔單止無人理，最後重被人解體，隨街丟棄，認真慘情。步姐因為喺MV內要扮扯線公仔，所以要吊威吔，又搽到全身白雪雪，展示機械人嗰種冰冷感。
另外，向來多產嘅步姐又為仲間由紀惠同小田切讓合演嘅古裝愛情片《忍~SHINOBI~》創作主題曲《HEAVEN》，新歌會配合電影上映喺九月二十一日推出。