現年31歲嘅日本女優蒼井空早於2010年開咗個微博，去內地發展1年半，微博粉絲人數已超過1500萬人，蒼老師亦用中文同內地fans傾偈學中文，又不時練書法，早前先同網民玩咗微博「Q&A」，解答fans嘅問題，網民都好踴躍留言，就知蒼老師幾咁受歡迎!

有內地報道指，雖然蒼井空近年有拍過MV、網路劇，亦成日喺微博暗示自己對中國文化嘅喜好，估計有心喺內地發展，不過基於形象喺內地發展受限，蒼老師嘅演技同唱功亦被受質疑，令佢冇辦法可以好似一般海外藝人咁輕易接job，但事實證明蒼老師並唔係冇機會再做「老師」。

日前蒼老師就喺日本最大財經報日本經濟新聞嘅中文網，開咗個「蒼老師學經濟」嘅個人專欄。喺專欄中嘅第一篇文章，蒼老師先自嘲已經到咗一個必須瞭解「經濟」嘅年齡，原來蒼老師本身都係讀理科，佢都好鍾意數字，佢仲簡單對比中日兩國嘅物價。

蒼老師於文中，坦言中國物價並唔係朋友想像中咁平，由於人民幣升值，喺換算日元嗰陣，物價會更高，更舉例喺中國個午餐都可以用成3600日元(約235元港幣)，蒼老師笑言喺日本已經係高級餐廳嘅價格，又講喺內地日式居酒屋，叫一條花鯽魚居然成3000日元(約195元港幣)，蒼老師又指已經係高級魚嘅價格，但係若果大家去市場買蔬菜就好平，10蚊人仔都買到好多，亦指西瓜都好平，令佢好想帶番日本。

對於早前被邀寫中文網上日經專欄，蒼老師都表示有壓力，因為日經一直畀人好嚴肅嘅感覺，不過當時協商開設專欄嘅人同佢講：「在機場兌換外幣產生的手續費和匯率也屬於經濟。」蒼老師先放心去試，覺得「經濟」或許有啲意思。睇嚟蒼井空今次真係會喺內地變成「蒼老師」!「蒼井空是世界的」!