港股噚日成交不足400億銀,創近一年低,進入塘水滾塘魚mode。話個市唔得咩?恒指又繼續喺23000大關徘徊,唔肯回頭。話個股唔得咩?阿爺keep住有國策出,噚日輪到習近平力撐新能源車,結果開足turbo向前衝。呢啲市況最蝦人玩,弱又弱唔晒,亂衝隨時出事,買入長揸又錯過咗最佳時機,認真左右做人難。
你話港股難玩,內地股神林園話A股仲大鑊!佢噚日接受電視訪問,話A股由2007年6000點跌番落去2000點,跌到係人都驚,仲話好多A股老散,連電腦都唔想開,跌就由得佢跌,心灰意冷程度可想而知。林園自己亦有損傷,身家蒸發三成,以佢嘅財富計,絕對唔係少數。不過,佢就話自己會繼續搵投資機會,更指A股已經好抵買,冇理由而家走去賤賣股份。