韓國男神金秀賢主演嘅新片《Real》將於本月28號上映，不過有傳電影正接受韓國電檢評級，據知因為金秀賢嘅打鬥戲太暴力，而Sulli嘅床戲尺度亦太大，《Real》好有可能被定為19禁，即未成年觀眾不可入場觀看嘅三級片。但片商一於少理，近日Keep住公開新劇照及預告造勢，今日就公開近1分鐘嘅主要預告片。

預告一開始見飾演金秀賢心理醫生嘅李聖旻對金秀賢講：「張泰英先生，聽講你殺過人？其實我都喺另一種意義上曾試圖殺人。之後嘅四星期內，我要殺死張泰英嘅隱藏人格。」預示金秀賢新片玩人格分裂。金秀賢嘅兩個角色分別係賭場老大及神秘投資人，其中一個角色就戴住眼鏡及白色面具出現，於預告片最後一幕，兩個一模一樣嘅張泰英對峙，其中一個話：「我講過，你再敢扮我出現，我絕對唔會放過你。」緊湊嘅情節令劇迷相當緊張及期待。

另外，金秀賢孖女神全智賢合作嘅韓劇《來自星星的你》，於2013年播出時爆紅，近日泰國決定翻拍呢齣神劇，由現年25歲泰國、奧地利混血兒人氣男星Nadech飾演「都教授」，至於「千頌伊」則由27歲嘅泰國、挪威混血兒女星Matt Peeranee飾演，據知泰版《來自星星的你》將於下月開拍。