馬力病中苦戰當選,不過勝出卻唔代表轉運,三年之後,馬力都係捱唔住癌魔侵襲而過身,最離奇嘅係,佢離世嘅日期,亦係8月8號,有時世事嘅嘢,真係巧合到令人難以置信。有人好感慨馬力英年早逝,據八方了解,國家今次出盡全力治療馬力,佢入住嗰間廣州中山大學附屬腫瘤醫院,頂級大國手雲集,而馬力生前透露,主診醫生曾幫已故前副總理黃菊醫病,可見國家對佢幾咁重視。
廣州呢間腫瘤醫院喺國內好出名,喺腫瘤科醫院排名第一,集醫療、教學、科研於一身,亦係世界衞生組織(WHO)癌症研究合作中心,八方聽聞三位同樣因癌病過身嘅左派紅人,包括港區人大代表鄔維庸同李澤添,以及上屆立法會進出口界議員許長青,都曾經喺呢間醫院接受治療。