趙世光今年6月擱置旗下嘅華光海運上市計劃，原來佢唔止要為華光海運上市費心，堂堂上等人，佢仲要為住嘅問題費心。
華華唔係講笑，話說趙世光06年10月一擲3.8億銀「天價」，買咗石澳大浪灣道13號屋。當時以呎價4.75萬銀創全港住宅呎價嘅紀錄。雖然呢個紀錄今年中被倚巒2號屋嘅5.62萬銀呎價所破，但華華問過地產界人士，以屋地有獨立門牌冧巴計，趙世光嘅石澳屋呎價仍然係紀錄，而以總成交價計算，亦係紀錄保持者。
買咗間咁貴嘅樓，趙世光本來諗住大執重建，將間屋移過啲，將個十幾萬呎嘅花園合二為一。佢已經喺舊年底向城規會申請，將屋地同部份花園嘅用途互換，仲申請以0.9倍地積比，興建1幢3層高獨立屋。不過，就俾「鄰居」反對，規劃署亦唔支持。

嫌山頂大宅唔夠住

趙世光同華華講，𠵱家住緊喺山頂（僑福道環翠園），得嗰幾千呎唔夠住，所以打算搬去石澳嗰間樓面有兩萬幾呎嘅獨立屋，外面有個大花園可以散吓步，不過重建計劃仲同政府傾緊，未知幾時搞掂。
又係嘅，趙世光喺04年中風入院，咁住喺石澳大屋，環境好啲，活動空間多啲，對身體都好啲。佢仲同華華講，𠵱家身體冇咁好，華光嘅日常事務交畀大女式明同班管理層睇住，自己就睇吓大局咁。
住得喺石澳道洋房嘅業主都係非富則貴，物業買賣仲要通過石澳業主委員會批准先得，小小超李澤楷間「木屋」都喺嗰度，絕對係上等人先至有得留低。

電郵：mailto:[email protected]