當年今日
關於我們

求驗客手記:誤判越位僅負曼城
紅軍聖誕快落

蘋果日報 2013/12/28 00:00


利物浦強勢以榜首姿態過聖誕,不過喺周四「拆禮物日」大戰作客曼城就以1:2落敗,一輪賽事之後就由第1跌到第4,真係聖誕快「落」。紅軍呢場波其實輸得幾有爭議性,上半場史達寧單刀過埋龍門但被誤判越位;係就係唔抵,不過利物浦喺下半場仲有好多埋門機會,一個都把握唔到又怨得邊個呢。
empty
單刀慘被誤判越位
開波19分鐘紅軍前鋒蘇亞雷斯交球靚直線畀史達寧,過埋赫特之後被判越位在先吹停;不過從慢鏡頭睇番,史達寧起碼同企最後嘅高拉洛夫相差兩個身位,認真無辜。不過,紅軍喺5分鐘後始終係先開紀錄嘅一隊,又係阿蘇交靚波,史達寧接應過埋赫特,但畀隊友菲臘比古天奴搶先一步後上射入。曼城喺完半場前大反擊,中堅高柏尼先喺31分鐘接應角球頂入扳平,到補時階段一次反擊由尼格度反超前,紅軍門將米洛列特判斷失誤,拍到個波照入。
到下半場利物浦傾巢反擊,不過門前把握力始終爭啲,進攻上靠晒阿蘇,射又係佢、傳又係佢,可惜喺曼城後防有險象但冇入波,佐敦軒達臣同格連莊臣都喺門前失機;最黃金一次機會由史達寧糟蹋,喺73分鐘阿蘇左路精準傳中,呢位翼鋒面對個龍門,點知射門一飛沖天
empty
尼格度(右)完半場前反攻射門得手,助曼城反敗為勝。 路透社
羅渣士:向曼系球證說不
紅軍輸畀曼城之後就一跌跌落積分榜第4名,領隊羅渣士賽後好唔順氣話:「旁證喺誤判越位嗰陣根本跟唔上位置,而蘇亞雷斯亦經常受到尼史葛侵犯,但球證冇吹罰。希望下一次利物浦對曼市嘅比賽,唔好再由『大曼徹斯特球證』(Greater Manchester referee)執法。」羅渣士諷刺嚟自保頓嘅球證李爾美臣坦護大曼徹斯特郡球隊,足總亦已調查,隨時秋後算賬處分。不過從數據睇,美臣之前4次執法曼城嘅比賽,其實藍月亮一場都未贏過。
紅軍要即刻收拾心情,因為到咗下星期日又有大戰要打,作客出戰車路士。車路士喺拆禮物日主場1:0小勝史雲斯,不過車仔中場主力拉美利斯喺場波領黃牌,會喺下周日大戰停賽。
empty
蘇亞雷斯傳球嗰陣,史達寧(箭嘴示)明顯冇越位。 互聯網
足本收睇《亂噏24》x劉嘉玲; 鄭秀文@杜琪峯再度登場!
周一至周五《亂噏24》約定你: http://bit.ly/appletalk24