現年40歲嘅「岡本男神」何潤東同女友Peggy拍拖8年，噚日喺台北登記結婚，何潤東晏晝喺微博宣佈喜訊：「婚戒不如自己老婆親手設計的婚環來的有新意。明年的今天是我爸媽結婚50年，也會是我結婚一周年。」噚日原來仲係父母嘅結婚49周年，揀呢日註冊鋪定路下年同父母一齊慶祝，何潤東亦都希望可以好似父母咁白頭到老。

未定時間擺酒

早喺前年父親節，何潤東已經答應爹哋會喺兩年內結婚生仔，𠵱家就行出第一步。據知，何潤東婚後先陪老婆一星期，月中會去內地開工，稍後會喺台北補辦喜酒，何潤東話：「還沒正確決定在甚麼時候！因為目前手頭上還有一部電影。」Peggy仲為自己設計嘅手環創立咗個名為「28women」嘅品牌，原來呢個名都有特別意思，用嚟紀念自己28歲嗰年遇上何潤東，佢話：「在28歲的那年遇上了他，28歲時最開心的時刻。因為喜歡畫女人的側臉。」Peggy又解釋手環嘅概念嚟自啞鈴，代表運動，做運動就代表健康，真係有心思。
撰文：馮仁昭