滙豐控股（005）前日跌到33蚊近14年低位，連「股壇辣妹」胡孟青做緊節目都忍唔住流淚，但有「金牌莊家」之稱嘅立法會議員詹培忠噚日就斷言，5個多月前已經預計咗。
事關舊年底佢同滙豐亞太區主席鄭海泉兩個人撐枱腳時，大班好關心大笨象股價走勢，但不嬲「贏谷、輸縮、心清、數熟」嘅金勞詹就答話，當時港股已低見10676點，距離07年尾直通車擱置跌咗60%，而外圍金融機構幾乎全部狂瀉，冇理由滙控跌得40%咁少，最多只值40至50蚊咁話。睇返轉頭，金勞詹其實估得保守咗。
現時獅子山下皆為供股哀鳴，但金勞詹就倖免於難，佢話：「香港人邊個冇滙控，除非儍儍哋啦，而我就係儍儍哋嗰個！」

自認儍冇落叠

今個月初先豪言喺40蚊掃60萬股之後再供股嘅佢，噚日轉軚唔玩，話本嚟估滙控喺40蚊個價四供一，結果大失所望，何況場外衍生產品太墟冚，accumulator（累計認股期權）開價低至24蚊，短期蝕錢風險咁高，梗唔會咁儍去供，有錢不如過大海玩百家樂喎。
講起同樣牽動人心嘅華懋世紀爭產官司，金勞詹笑言，風水師陳振聰近期高調蒲頭，皆因佢炒蒙古能源（276）蝕得太甘。佢又話華懋慈善基金忽然有錢打官司，可能係入股香港資源（2882）賺咗一筆。華華問過代表隻基金嘅律師何文基，佢話冇聽過呢個講法喎。

李華華
mailto:[email protected]