身兼行政會議成員嘅新民黨主席葉劉淑儀，今日率領黨友就預算案第3次約見財爺波叔反映意見。同民建聯補選後唔再提派錢唔同，新民黨繼續向波叔提出「無交稅、無物業、無交差餉」嘅香港成年永久居民，每人派發3000蚊現金建議，但葉劉強調，呢個建議「唔等於叫政府派錢，唔係將盈餘派哂佢，而係分配平均啲啫」，佢話波叔至今唔肯講會唔會做，只係感到政府知道今次預算案係遺漏咗一啲人，正研究用關愛基金補漏，認為唔係清貧人士先至用到關愛基金喎！

葉劉又話今日見財爺時，該黨採納咗人民力量前議員「大嚿」陳偉業喺2012年都提出過，要求政府改善寬免差餉嘅安排，每名繳納人士只可就名下3個物業獲得寬免。對於採用大嚿舊橋，葉劉話：「我哋對事唔對人，同佢政治立場無關」。問到會否投票反對預算案，葉劉就話要睇吓政府點回應先再決定。

《蘋果》沙士15周年系列網站，正式登場：
https://hk.feature.appledaily.com/sars15/