連詩雅、鄭融、樂隊Dear Jane成員Tim同Jackal、梁諾妍、黎紀君、「大埔Lulu」董嘉儀、小肥今日喺迪士尼樂園，聯同一班參賽者參加跑步活動，佢哋挑戰「雷神托爾5公里跑」，藝人以梁諾妍成績最佳，佢以24分鐘首先衝線，接住就係25分51秒嘅Tim、31分45秒嘅小肥、31分59秒嘅大埔Lulu、34分24秒嘅鄭融、37分48秒嘅Jackal，連詩雅同黎紀君就一齊以38分22秒跑到終點。

向來有跑步嘅連詩雅同鄭融都跑得好輕鬆，仲笑住話跑到樂園入面，會排隊同樂園嘅卡通人物合照。問到連詩雅平時有冇同緋聞男友徐浩跑步？佢話：「通常一個人跑，因為大家都忙。」佢指同徐浩係正常社交，一切順其自然。但提到徐浩喺社交平台上上載同連詩雅頭貼頭嘅合照，佢轉移話題指：「好多人都有post相，其實今次演唱會，大家都花咗好多額外時間去籌備，希望之後有part2同巡迴喇！」