亞洲電視喺黃金時間播放嘅《香港有飯開》難得有7點收視，點知亞視突然自廢武功決定停播，最後一集亦喺噚日出街。停播原因眾說紛紜，有網民懷疑佢哋喺「阿信屋」事件後，推出超市霸權環節得罪人；亦有傳言話公司「極高層」一言堂，要求見好就收。總之又係一單世紀懸案。
不過亞視本身就冇超市廣告，使唔使怕得罪廣告商，真係得佢至知。亞視發言人就澄清，一早計劃拍70集，家只係「稍事休息」，絕非腰斬節目，今年底或明年初會出第二輯添食，一班台前幕後班底唔會冇飯開。姑且聽住先，到時睇吓點。