今日傳出謝霆鋒同內地花旦周迅因為睇搖滾騷撻著，不過因為前妻張栢芝一直想復合，霆鋒亦唔想栢芝生醋意，低調同周迅交往，不過紙始終包唔住火，其實近半年周迅頻頻來港，但又唔似為工作，不時喺大小騷上面見到佢，如果公開戀情，相信好多人都會祝福嘅。

周迅同張栢芝都係好戲之人，兩個都係影后級人馬，不過講到形象同層面廣，雖然周迅年紀比栢芝大，但依然略勝一籌。加上周迅都叫進軍過荷里活，拍過西片《雲圖》，而且喺中港台三地奪獎無數，又係好多時裝名牌寵兒。相反栢芝復出之後，票房失利不特止，仲被人狠批演技浮誇，認真黑仔。


38歲周迅90年代開始拍好多內地電視劇，演技一直已經受到肯定，尤其《人間四月天》飾演林徽音十分出色。電影方面，98年拍婁燁嘅獨立電影《蘇州河》，拿下第15屆巴黎國際電影節最佳女主角，06年又憑《如果·愛》橫掃中港台影后，包括香港電影評論學會大獎、亞太影展、香港電影金像獎、香港電影金紫荊獎、台灣金馬獎等。

而張栢芝亦曾經憑《忘不了》奪得香港電影金像獎影后，可惜後來一度息影，復出後演技漸見浮誇，慘成「金話梅」最爛女主角。